Eraldaketara deitu du Juan Jose Etxeberriak Deustuko errektore kargua hartzean

Lemazain berria du Deustuko Unibertsitateak: Juan Jose Etxeberria (Tolosa, Gipuzkoa, 1966), Zuzenbide Fakultateko irakaslea. Apirilean izendatu zuten errektore, Jose Maria Guiberten ordez, eta atzo hartu zuen kargua, Bilbon egindako ekitaldi batean. «Barne eraldaketa bat» abiatzera deitu zituen unibertsitateko kideak: «Gure unibertsitateak eraldatu egiten du, eta gure unibertsitatea eraldatu egiten da. Gu geu bizkor aldatzea beharrezkoa da gure bikaintasuna mantentzeko».

Eraldaketa premia horren seinale, errektoreordetza batzuk berrantolatu ditu Etxeberriak. Ikerketa eta Nazioartekotze errektoreordetzak bulego bakarrean elkartu ditu, baita Ikasketa eta Eraldaketa Digitaleko sailak ere. «Euskararekiko konpromisoaren» adierazle, Hizkuntza Politikak ere berariazko alor bat izango du, Donostiako campuseko errektoreorde Xabier Riezuren ardurapean.

Bestalde, zuzendari kudeatzaile lanetan jarraituko du Gonzalo Meseguerrek, eta idazkari nagusi karguan, Stella Solernouk. Aurpegi berrien artean, berriz, Aitziber Irigoras Durangoko alkate ohia dago; Unibertsitate Komunitateko errektoreorde arituko da. «Ikuspegi transbertsala» galdegin die Etxeberriak denei: «Fakultate guztiei entzun behar zaie, eta komunikazioa erraztu».