Landareak lehertuak, altxatuak, paldoak eroraraziak, lurrak xehatuak: halaxe atzeman dute Kanboko Marieneko lurretan (Lapurdi) aurtengo maiatzean landatu zuten baratzea. ELBk, Lurzaindiak eta Ostiak deitu zuten baratzea landatzera, apiril hondarrean lurrak irauli ondotik. Horiek berek dute salatu, hain zuzen, baratzeari eraso egin diotela orain, eta mobilizatzera deitu dute larunbaterako, abuztuaren 2rako hots, baratzea «saien kontra babesteko»: txorimaloak eginen dituzte; herritarrei galdegin diete «jantzi zaharrak, txapelak eta girgilak» ekartzea horien mozorrotzeko.
Laborantza lurren sinbologiari so egin diote militanteek behin baino gehiagotan. Hasieratik errana dute: «Marienea laborantza lurra da, eta hango belardiak betidanik landuak izan dira»; horren erakusteko egin zuten maiatzaren 17ko ekintza. Orain, berriz, erasotzaileak saiei konparatu dituzte, eta, nolazpait, txorimaloak eginen dituzte horien uxatzeko.
2014tik, bazterrak harrotu ditu Kanboko herri sartzean eraiki nahi duten etxe multzoak. Mobilizazio andana bat antolatu dituzte auzapezaren taldeak bultzatu Marieneko lurren artifizializazio saiakeraren kontra, eta auzitara ere heldu da gaia, elkarteek helegiteak aurkeztu baitzituzten administrazio auzitegian, hirigintza planaren eta Bouygues enpresari emandako eraikitze baimenaren kontra.
Militanteak ere auzipetu dituzte desobedientzia ekintzetan parte hartzeagatik, eta baita Kanboko herriko kontseiluan izandako gertakarietan Christian Deveze auzapezari eraso egitea leporatuta ere; irailean izanen dute auzia. Iazko maiatzean, taktikak bateratu eta Marienea gelditu arte mobilizatzera engaiatu ziren eragileak.
