Ernai gazte mugimenduak gorriz margotu du gaur goizean Donostiako Aizepe elkartearen kanpoaldea. Parte Zaharreko elkarte gastronomiko horrek bazkide bat kaleratu du, bazkide horrek berak atzo jakinarazi zuenez, «emakume bati sukaldean sartzen uzteagatik». Izan ere, elkartearen araudian jasotzen denez, gizonek soilik dute sukaldean sartzeko eta janaria prestatzeko aukera; are, gizonak soilik izan daitezke bazkide.
EKINTZA ZUZENA!
— Joseba Alvarez (@JosebaAlvarez) February 10, 2026
Emakumeak baztertzen dituen elkarte gastronomikoa salatu dute, emakume bat elkartean sartzen uzteagatik bazkide bat kaleratu dutelako... pic.twitter.com/F4WYjzENYP
Ernaik salatu du gisa horretako «jarrera matxistek» ez luketela tokirik izan behar, eta sare sozialen bidez nabarmendu du feminismoaren eta berdintasunaren aldeko borrokarako «oztopo» direla Aizeperen gisako elkarte gastronomikoak. Horrez gain, gazte mugimenduak gogorarazi du sukaldean sartzea eta bazkide izatea ez ezik elkarteak danborradan parte hartzea ere debekatzen diela emakumeei.
Ibon Sarasola Monzon bazkideak Irutxuloko Hitza-ri kontatutakoaren arabera, bere familiako emakume bati sukaldean sartzen utzi zion 2024an, eta handik egun batzuetara urtebeterako kanporatuko zutela jakinarazi zioten; 2025eko uda amaieran izan zuen «behin betiko» kaleratzearen berri. Elkarteak, baina, hedabide horri kontatu dio beste arrazoi batzuk direla-eta erabaki dutela hura kanporatzea.
