Voxen ekitaldiaren kontra Lasarte-Oria antifaxista lelopean egindako protestaren antolatzaileak pozik agertu dira gaur herritarrek emandako erantzunarekin, baina Ertzaintzaren jarrera txarretsi dute: azaldu dutenez, ertzainak «modu itsu eta basatian» oldartu ziren Lasarte-Orian (Gipuzkoa) bildutako herritarren kontra, «protestan izan ala ez», eta, horren ondorioz, herritar bati aldaka apurtu zioten eta gutxienez beste bi zaurituak izan ziren borra kolpeak zirela eta. «Berriro ere, argi gelditu zen nor dagoen Poliziaren babespean eta nor Poliziaren jomugan».
Protestaren deitzaileek berretsi dute faxismoa goraldian den honetan «ohorea eta beharrizana» dela antifaxista izatea.
