Ertzaintzak «talde kriminal» bat desegin du Donostialdean, adingabe baten aurkako sexu eraso baten ikerketatik abiatuta. Eusko Jaurlaritzako Segurtasun Sailak jakinarazi duenez, 19 eta 21 urte bitarteko lau lagun atxilotu ditu— hiru gizon eta emakume bat—, iruzur eta mehatxu jarraituak egitea eta talde kriminal bateko kide izatea leporatuta.
Segurtasun Sailak jakinarazi duenez, talde horrek 300 laguni baino gehiagori egin die iruzur, batez ere Espainian, iragarki faltsuen bidez. Iruzurren bidez 50.000 eurotik gorako irabaziak lortu zituzten.
Ikerketa joan den urtarrilean hasi zuen Ertzaintzak, Donostian adingabe baten kontrako sexu eraso baten ustezko egilea atxilotu zutenean. Ertzaintzak, gizonezkoaren sare sozialak arakatzean, eduki sexualak eta harreman zerbitzu faltsuen iragarkiak atzeman zituen, eta hortik abiatutako ikerketari esker identifikatu zituen beste pertsona batzuk.
Ertzaintzak dioenez, iruzurrak egiten zituen taldea 2022ko irailetik ari zen jardunean. Iragarki faltsuak argitaratzen zituen kontakturako plataforma digitaletan, eta, interesdunak harremanetan jartzen zirenean, ordainketa elektronikoak edo transferentziak egitera edo kutxazainetan dirua sartzera behartzen zituzten. Gainera, biktimei mehatxuak eta xantaiak egiten zizkieten: diru gehiago eman ezean kontratatutako zerbitzua eta elkarrizketak senide eta hurbilekoei zabalduko zizkietela esaten zieten.
