Zenbait gazte ertzain batzuei irainka hasi dira, eta zenbait objektu jaurti dizkiete, 05:30 aldera, Getxon (Bizkaia), ohartu direnean Poliziaren bereizgarririk gabeko auto bat Ertzaintzarena zela. Hala adierazi du Eusko Jaurlaritzako Segurtasun Sailak. Iturri berak zehaztu du Ertzaintzaren patruila bat kalez jantzita zebilela ordu horretan, eta zenbait gazte ohartu egin direla poliziak zirela. «'Zipaioak', 'putakumeak' eta beste irain batzuk» oihukatu dituzte gazteek, Segurtasun Sailaren oharraren arabera, eta autora objektuak bota.
Segurtasun Sailak ertzainen aurkako erasoa gaitzetsi du, eta eraso hori jasan duten poliziei elkartasuna adierazi. Ertzaintzak berak ikerketa bat abiarazi du, «irainka eta objektuak botatzen» aritu direnak nor diren argitzeko. Ertzainek «herritarren segurtasuna bermatzeko» lan egiten dutela esan du Segurtasun Sailak, eta Getxon gertatutakoa «bizikidetzaren eta hura eraikitzeko oinarrien aurkakoa» dela.
