Eguraldia lagun, festa giro alaiean ospatu dute, Lekeition (Bizkaia), Euskal Eskola Publikoaren aldeko jaia. Dantzak, musikak, jolasak eta ikuskizunek hartu dituzte herriko kaleak, hezkuntza publikoaren balioa aldarrikatzeko.
EHIGE guraso elkarteen federazioak balio hori aitortzeko eskatu dio Eusko Jaurlaritzari, eta Euskal Eskola Publikoa hezkuntza sistemaren "ardatz" bihurtzeko galdegin dio, hura delako aukera berdintasuna bermatzen duen eredua.
Guraso elkarteen esanetan, "EAEko hezkuntza sistema anomalia bat da bai Euskal Herrian eta bai Europako Batasunean ere". Nabarmendu dute Europan erakunde publikoek eskola publikoaren alde egiten dutela, eta eredu publikoak, batez beste, "sistema osoaren %80 gainditzen" duela. "Eskola publikoak hazi nahi du, eta, horretarako, erakunde publikoen babesa behar dugu. Guztiok dakigunez, hezkuntza eskubide bat da, eta soilik botere publikoek dute hura bermatzeko ahalmena; beraz, Euskal Eskola Publikoaren zeregin egituratzailea eta funtsezkoa aitortu behar dute", adierazi dute.
Jaian parte hartu du Cristina Uriarte Jaurlaritzako Hezkuntza sailburuak, eta hark eredugarri jo du Araba, Bizkai eta Gipuzkoako hezkuntza sistema. Espainiako hezkuntza sistemarekin alderatu du. Haren esanetan, Araba, Bizkai eta Gipuzkoan, estatuan ez bezala, hezkuntza itun "egonkorra" lortu da, eta hezkuntza "lehia politikotik" salbu gelditu da. Espainian, aldiz, "zazpi hezkuntza lege" onartu direla nabarmendu du.
Horrez gain, Uriartek gaineratu du hiru herrialdeetako hezkuntza sistemak ez duela etsi "inposizioen aurrean".
Datorren urtean, Errenterian (Gipuzkoa) izango da eskola publikoaren aldeko festa. Julen Mendoza Errenteriako alkatea Lekeition izan da, gaur, lekukoa hartzeko.
Lekeition jaso berri dugu hurrengo urtean gure herrian eskola publikoaren aldeko festa egiteko lekukoa. Plazerra eta ohorea!! Eskerrik asko. pic.twitter.com/4YE1oV5W35
— Julen Mendoza (@julenmendoza) 2018(e)ko ekainaren 3(a)
Euskal Eskola Publikoari babesa agertu diote hainbat alderdi politikotako ordezkariek ere. Jaialdian izan dira EAJ, EH Bildu eta Elkarrekin Podemoseko politikariak.
Lekeition, Euskal Eskola Publikoaren jaia ospatzen. Orain arte bezala, eskola publikoak gogor ekingo dio gure herriko hezkuntza etenbabe hobetzeko. Zapran gagoz! pic.twitter.com/nGjxCY6iiA
— Cristina Uriarte (@c_uriartetoledo) 2018(e)ko ekainaren 3(a)
Ederto pasatzen ari gara eskola publikoaren jaian Lekitxon! #ZapranGagoz Aurrera eskola publikoa!! pic.twitter.com/Tp9OazR3w8
— EH Bildu Bizkaia (@ehbildubizkaia) 2018(e)ko ekainaren 3(a)
#ZapranGagoz Kalitatezko Eskola Publikoa gure ardatz nagusietako bat da. #Lekeitio-n gaude gaur Hezkuntza Komunitateak egiten duen lanari gure esker ona adierazteko eta Eskola publikoaren festari babesa emateko. Hona @LanderMartinez_ Idazkari nagusiaren hitzak pic.twitter.com/BHY8nADDuw
— Podemos Euskadi (@PodemosEuskadi_) 2018(e)ko ekainaren 3(a)
