Espainiako Trantsizio Ekologikorako Ministerioak lau parke eolikoren proiektuak artxibatu ditu. Parkeak Tausten (Espainia) egitekoak ziren, baina horien hustuketa azpiegiturak Araban egin gogo zituzten; eta, gainera, linea elektrikoek ia Nafarroa osoa zeharkatzea zen asmoa. Nafarroako Gobernua, lekuan lekuko udalak eta herri mugimenduak proiektu horien kontra agertu izan dira.
Arabako Lurralde Historikoaren Aldizkari Ofizialean atzo jaso zuten Trantsizio Ekologikorako Ministerioaren erabakia. Hartan zehazten denez, asmoa zen proiektuek barne hartzen zituzten parke eolikoen hustuketa azpiegiturak Burgosen (Espainia) egitea, baina eragina izanen lukete Arabako lau herritan ere: Berantevillan, Armiñonen, Erriberabeitian eta Gasteizen.
Gainera, proiektu horietatik hiruren kontrako ingurumen txostena ere jaso dute aldizkarian.
