Larunbat gauean jazo zen erasoa. Bi saltoki handiren inguruetan, gizonezko bat andrazko bati oldartu zitzaion; emakumea bortxatzeko ahalegina egin zuen, baina hark kontra egin zion. Nahi zuena lortu ezin zuela ikusita, emakumea han inguruko pendoitz batean bota zuen gizonak. Emakumeak ertzainengana jo zuen erasoa salatzera. Haiek igandean atxilotu zuten gizonezkoa, Trapagaranen (Bizkaia). Astelehenean eraman zuten epailearengana, deklaratzera, baina luzatu egin zioten atxiloaldia; azkenean, atzoko azken orduan, 28 urteko gizona espetxeratzea erabaki zuen Barakaldoko epaile batek.
Aurretik ere, Poliziak atxiki izan du sexu abusuak egitea leporatuta; apirilean, Barakaldon, zehazki. Barakaldoko Udalak adierazpen bat onartu zuen atzo erasoa gaitzesteko: "Tinko arbuiatzen dugu andreen osotasunaren eta bizitzaren kontrako edozein motatako ekintza edo jarrera".
Udalak, halaber, bat egin zuen herenegun arratsaldean mugimendu feministak erasoa salatzeko egina zuen elkarretaratzerako deiarekin. Argitan emakumeentzako aholkularitza zentroak egin zuen protestarako deia. Horrekin batera, instituzioei mintzatu zitzaien; gogorarazi zien gizonen eta emakumeen arteko berdintasuna lortzeko estrategia beteak behar direla erasoak eragozteko, eta "autodefentsa feminista" dela erasoon aurkako biderik osoena.
