Joan den astean Miarritzen egindako polizia operazioaren inguruko balorazioa egin du ETAk, Gara egunkarira bidalitako ohar batean. Frantziako Poliziak Natalie Chaseriaux eta Enrique Lopez atxilotu zituen, ETAren egitura tekniko-logistikoarekin lotura izatea egotzita. Bada, ETAren arabera, "armategiak zigilatzeko prozesuaren kontrako eraso zuzena da" operazio hori. Salatu du "ETA eta Nazioarteko Egiaztatze Batzordearen artean adostutako eta eragile ugariren babesa jaso duen" prozesuari egin diotela eraso.
ETAren ustez, PPren gobernuak "duen kirisi sakonarekin" dute lotura atxiloketek. "Bere ohiko harrokeriarekin, gerra hizkeraren bidez eta indar militarra erakutsiz ezkutatu nahi du porrot politikoa". Frantziako Gobernua ere kritikatu du, Espainiako Gobernuaren "jarrera muturrenekoarekin lerrokatuta" dagoela leporatuta. ETAren arabera, atxiloketek eta aurrez Nazioarteko Egiaztatze Batzordearen aurka egin direnek erakusten dute bi gobernuek "ezinezko" bilakatu nahi dutela gatazkaren konponbidean aurrera egitea: "Bestela, zer bilatzen dute ETAren armak erabilera operatibotik kanpo uztea helburu duen prozesuari eraso eginda?".
ETAk jakinarazi du "erasoaren" inguruko irakurketa helaraziko diola Nazioartzeko Egiaztatzeko Batzordeari, hark egoera azter dezan.
