EH Bilduko kanpainako bozeramaile Oihana Etxebarrietak esan du EH Bildu «ezkerreko subiranisten etxea» dela, baina «gero eta gehiago» dela «Euskal Herrian aldaketa politikoa nahi duten guztien etxea». Ondarroako koalizioaren hauteskunde bulegoan egon da Etxabarrieta; «herritarrei posta bidezko botoa gerturatzeko» bulegoa da hori. Koalizioak duen «balio politiko handienari» buruz aritu da bozeramailea han: «Daukagun oinarria da gure baliorik handiena, eta horrek erakusten du EH Bildu dela indar bat gero eta gorago doana».
Ziurtatu du herriz herri doazen EH Bilduko ordezkariak ikusten ari direla euren ekitaldietara ez direla soilik joaten koalizioaren boto emaile tradizionalak: «Gero eta herritar gehiago hurbiltzen dira gure proiektua ezagutzera eta, batez ere, herrialdearentzat dugun proiektua ezagutzera».
Etxebarrieta sinetsita dago «aldeko haizea» duela koalizio subiranistak: «Gero eta gehiago gara, eta gehiago izango gara; eta apirilaren 21aren ondoren, etxe honek hazten jarraituko du, aldaketaren haizeak gero eta indartsuago jotzen duelako Euskal Herrian».
