Zigortu dituzte baina ez dira preso sartuko. Gibelapenezko zigorra ezarri die Parisko auzitegi korrekzionaleko epaileak bi ETA kide haien etxean aterpetzeagatik atxilotu zituzten hiru herritarrei: 18 hilabetekoa Graxi Etxebeherentzat eta sei hilabetekoa Terexa Lekunberri eta Jeff Mateorentzat. Iñaki Reta eta Xabier Goienetxea zazpi urteko kartzela zigorrera kondenatu ditu. Astelehenean eta atzo iragan zen bost euskal herritarren kontrako epaiketa Parisko auzitegi korrekzionalean. Maiatzaren 4an ETAk bere ibilbidea bukatutzat eman zuenetik lehen epaiketa zen.
ETAk jarduera armatua utzi eta lau urtera izan ziren Ortzaizeko atxiloketak, eta bi kideen ardura armagabetzeari begira armategia zigilatzea zela adierazi izan dute, geroztik, behin baino gehiagotan. Ideia hori berretsi dute auzipetuek auzitegian egindako adierazpenetan. Arriskuen jakitun eta egiten zutena euren gain hartuta egin zutela adierazi dute Etxebeherek, Lekunberrik eta Mateok.
