Euskal Herrian abiatuko da Frantziako Tourra, eta lehen hiru etapak osoki euskal lurraldeetan izanen dira. Kari horretara, Euskal Herria Mundura egitasmoa aurkeztu du Gure Esku-k, lasterketak duen oihartzuna baliatuz Euskal Herria nazioartera proiektatzeko. Erabakitzeko eskubidearen aldarria eramango duen ikurrin erraldoi bat sortzeko proiektua aurkeztua du, eta hasi da hori lortzeko dirua biltzen. Atzo, Ipar Euskal Herriko ibilbidean eginen dituzten ekintzak aurkeztu zituzten, hainbat herritarren babesarekin. Eragileetako ordezkariez gain, bertan egon ziren, besteak beste, Sandra Pochelu pilotaria, Mikel Amilibia Tourreko karabanako esataria eta Mathias Libier bodyboarderra. «Munduari erakutsiko diogu Euskal Herria zazpi lurraldeko herri bat dela, eta erabakitzeko eskubidea duela», adierazi zuen Josu Etxaburu Gure Esku-ko kideak.
Zehazki, 4.000 ikurrin banatuko dituzte Ipar Euskal Herrian, eta lasterketa pasatuko den Lapurdiko herri guzietan animaziorako ekitaldi publikoak antolatuko dituzte. Hainbat leku esanguratsutan airetik hartzeko moduko irudiak sortuko dituzte ere, eta Tourrak Bidasoa ibaia zeharkatzean «ekitaldi berezia» eginen dutela iragarri dute, «bi aldeetan euskaldunak bizi garela eta aldarrikapen ugari duen herria dela erakusteko». Baionara iritsiko da Tourra, eta bertan egitarau berezia antolatuko dute. Uztailaren 5ean Zuberoatik pasatuko da lasterketa. Han ere mobilizatzera deitu dute. Azkenik, Frantziako Tourreko antolakuntzari eskatu diote euskararen presentzia bermatu dezala komunikazioan eta antolatuko diren ekitaldietan.
Herribiltzak bizikleta martxa
Herribiltzak bizikleta bira eginen du uztailaren 1etik 8ra, Frantziako Tourra iraganen den herrietatik gaindi, Independentzia aldarrikatzeko. «Frantziako Tourra ez da ongi etorria Euskal Herrian», adierazi dute agiri batean. Aldarrikapen bat baino gehiago zabaldu nahi dituzte ekintza horren bidez: Euskal Herriaren burujabetza, euskararen biziraupena, langileen esplotazioa desagertzea, bortizkeriarik gabeko harremanak gauzatzea, bizi baldintzak funtsean hobetzea, planetaren suntsitzea gelditzea eta adierazpen askatasuna bermatzea. Bizikleta lekuko bat herriz herri bizikletari batetik bestera pasatuz gauzatuko dute bira.
«Euskal Herria mundura» eraman nahi du Gure Esku-k Frantziako Tourrean
4.000 ikurrin banatuko dituzte Ipar Euskal Herrian, eta animazioak ere antolatuko dituzte. Hainbat herritarrek bat egin dute egitasmoarekin
![Gure Esku-ren agerraldia, atzo, Baionan. PATXI BELTZAIZ. Gure Esku-ren agerraldia, atzo, Baionan. PATXI BELTZAIZ.](https://www.berria.eus/uploads/s1/73/59/55/p014-f01.jpeg)
Iruzkinak
Ez dago iruzkinik
Ordenatu