Lapurdiko itsasertzeko ur zikinen tratamendua ikertzen ari dira. Baionako ingurumen zentroak ikerketa bat egin du jakiteko nolatan heldu diren milaka hondakin (tanpoiak, toallatxoak...) itsasora, eta ziurtatu du ur zikin horiek Euskal Hirigune Elkargoko sei udalerritako saneamendu sistemetatik eratorritakoak direla, eta isurketa horiek legez kanpokoak direla. Are, ikerketak baieztatu du lotura dagoela isurketa horien eta azken urteetan hondartzak itxi behar izatearen artean. Sud Ouest hedabideak eman du horren berri.
Ingurumen zentroaren ikerketak jopuntu ditu Biarritzeko, Bidarteko, Getariako, Donibane Lohizuneko, Urruñako eta Hendaiako (Lapurdi) gune turistikoetan dauden sei saneamendu sistemak. Antza, instalazio horiek ez dira nahikoak masa turismoa duten tokietarako eta, ondorioz, garbitu gabeko urek itsasoan amaitzen dute, araztu gabe, legezkoak diren mugez gaindi. Bereziki gertatzen da ur jasa handiak egiten dituenean. Duela aste batzuk, Baionako auzitegi judizialeko instrukzio epaile batek bi pertsona ikertu zituen kutsaduragatik: Euskal Hirigune Elkargoa eta haren ordezkaria, Suez enpresa.
Lapurdiko kostaldeko kasua 2021ean abiatu zen, CADE Ingurumenaren Aldeko Elkarteen Kolektiboak eta Arrantzaren Sailarteko Batzordeak salatu zutelako. Ikerketa txostenak egiteaz arduratu dira Ingurumenaren eta osasun publikoaren aurkako erasoen aurkako bulego nagusia, Frantziako Bioaniztasunaren Bulegoa eta Baionako Polizia judiziala.
Ur zikinen kudeaketari buruzko ikerketek badauzkate aurrekariak. Arcachongo (Frantzia) uren kudeaketa aspalditik dago ikerketapean. 2023 eta 2024ko neguan, euri urek gainezka egin zuten saneamendu sareetan, eta ur zikinek ibai arroetan amaitu zuten.
