Sei hilabetean behin egiten duen legez, Euskaltzaindiak hiztegia eguneratu du; oraingoan, 603 forma berri jaso dituzte, eta 2.359 berrikusi. Besteak beste, forma hauek gehitu dituzte: euskañol, autobus elektriko eta aztarna digital. Gainera, beste 3.630 adibide jaso dituzte. Horrenbestez, 53.142 forma jasotzen ditu orain hiztegiak, 72.035 adiera eta 122.209 adibide.
Forma berriei dagokienez, batez ere, irakaskuntzari lotutakoak landu dituzte: hezkuntza proiektu, lehen hezkuntza... Azaldu dutenez, DBH mailako testuliburuen saila bukatu dute, baita Lanbide Heziketako lexikoa osatu ere. Eta forma berriak sartu dituzte hiztegian: berotze global, probabilitatearen teoria, bluetooth, euskarri digital...
Baina eguneratzean ez dituzte testuliburuetako hitzak bakarrik jaso; hots, ohiko konbinazioak ere sartu dituzte: gezurretan harrapatu, gizalegez jokatu eta su artifizial. Lagunarteko formak: euskañol, bostekoa eman eta juntadizo. Forma adierazkorrak: bixi-bixi, sekula halakorik... Euskalkietakoak: hainbertzetan, pintada... Eta egungo erabilera maiztasunagatik bistaratu behar ziren batzuk: aztarna digital, harrera zentro...
