Hizkuntza komunitate gutxituetako hamalau ordezkari ari dira guztira hiru hilabeteko egonaldia egiten Euskal Herrian. Konkretuki, Eskoriatzan. Garabide elkarteak eta Mondragon Unibertsitateko Huhezi fakultateak elkarlanean antolatu duten aditu tituluari esker, hizkuntza eta kultura biziberritzeko estrategiak ikasten ari dira. Besteak beste, Kitxua, Nasa, Maia, Nahualt, Kaqchiquel, Movida, Kurdu eta Amazigh jatorrietako ordezkariek osatzen dute taldea.
Huheziko irakasle Jon Sarasua gidari dutela gaur BERRIAk Andoainen duen egoitza nagusira hurbildu dira, eta beren hizkuntzen egoeraren berri eman diote bertako kazetariei. Bizipenak eta ohiturak elkarbanatuz —amalurrari eskainitako dantza baten ondotik, bertso bat etorri da—, euskararekiko duten interesa agertu dute.
