36 urteko gizon bat atxilotu dute gaur goizean Gasteizko merkataritza gune batean, sexu eraso bat egitea egotzita. Bertako segurtasun langileek eman diote abisua Ertzaintzari.
Erasoa jasan duen emakumeak poliziei kontatu dienez, gizonaren furgonetan zeuden biak, eta bertan egin dio eraso. Handik ateratzea lortu du, eta bertan lanean ari zen langile bati kontatu dio gertatutakoa. Hark igorri die erasoaren berria ertzainei.
Ertzainak bertaratu dira, eta ikusi dute furgoneta handik alde egiten saiatzen ari zela, eta segurtasun langilea hori eragozten. Emakumearen, langilearen eta gizonaren testigantzak jaso dituzte. Azkenean, 36 urteko gizona eurekin eraman dute ertzain etxera, eta bertan egongo da epailearen esku utzi arte.
