Datorren urtean ere indarrean egongo dira Gasteizko garraio publikoko tarifen deskontuak, Tuvisa autobus zerbitzuak jakinarazi duenez. Horrela, hobariei eutsiko diete, eta, besteak beste, zerbitzua doan izango da aurrerantzean ere 15 urtetik beherakoentzat. Arabako Mugikortasun Agentziak gaur goizean berretsi du erabakia, eta, horren arabera, inplikatutako administrazio guztiek deskontuei eusteko konpromisoa hartu dute. Aplikatuko den %40ko deskontua hainbat instituziok ordainduko dute: %20 Espainiako Gobernuak, %10 Eusko Jaurlaritzako Garraio Sailak eta gainerako %10a Gasteizko Udalak.
Erabaki horri esker, datorren urtean ere garraio publikoa doakoa izango da 15 urtetik beherakoentzat baldin eta Bat txartel pertsonalizatua erabiltzen badute. Horrez gain, %40ko beherapenari eutsiko zaio abonuetan eta bidaia anitzeko txarteletan, eta %50eko hobaria izango da gazteentzako bidaietan. Tarifa berriak 2026ko urtarrilaren 1ean sartuko dira indarrean.
Garraio publikoa 15 urtetik beherakoentzat doakoa izanda, Gasteizko autobus zerbitzuak nabarmen bidaiari gehiago hartu ditu aurten. Iraileko datuek erakusten dute igoera zenbaterainokoa den: doako 204.821 bidaia erregistratu ziren, iazko irailean baino %70 gehiago.
