Gasteizko Udalak jaietan indarkeria matxista prebenitzeko neurriak areagotuko ditu aurten, Libre izan nonahi lelopean martxan jarriko duen kanpaina bidez. Puntu morea jarriko dute Santiago eguneko ospakizunetan —bihar eta etzi— eta Andre Mari Zurietako jaietan —abuztuaren 4tik 9ra—.
Ikusi gehiago
«Ingurune seguruak bermatu nahi ditugu, indarkeria matxistari aurre egiteko prebentzioko eta sentsibilizazioko tresnen bitartez», adierazi du Ana Lopez de Uralde Berdintasun zinegotziak. Herritarrek informazioa eta orientazioa jasotzeko gunea izango dute, eta, bertan, aholkularitza jaso ahalko dute eskura dituzten baliabideei eta indarkeria matxistaren kontra jarduteko jarraibideei buruz.
Puntu morean, indarkeria matxistaren aurkako informazioa emateaz gain, sentsibilizazio jarduerak landuko dituzte hezitzaile talde baten bitartez, jaien testuinguruan oinarriturik. Hala, materiala banatzearekin batera, puntu morera joaten direnekin solasaldiak egin ahalko dituzte —bereziki 12 eta 30 urte bitartekoekin—. Elkarrizketaren eta hurbiltasunaren bitartez, indarkeria matxistaren inguruko gogoeta eta prebentzioa sustatuko dute.
Zerbitzua denen eskura dagoela erabat bermatzeko, keinu hizkuntzan komunikatzeko gai den profesional bat izango da gunean, eta euskarazko zein gaztelaniazko piktogramak ere bai, ulertzeko edo komunikatzeko zailtasunak dituztenei laguntzeko. Horrez gain, emakumeek eskuko telefonoak kargatzeko puntu azkarrak izango dituzte bertan, une oro konfiantzazko pertsonekin edo hiriko laguntza zerbitzuekin harremanetan egon ahal izateko.
Santiago eguneko ospakizunetan, San Frantzisko kalean egongo da puntu morea, Farol Handiaren aurrean, 20:00etatik 02:00etara. Andre Maria Zuriaren jaietan, arretagunea tokiz aldatuko da, Posta eta Independentzia kaleen arteko bidegurutzean jarriko dutelako, Foruen plazaren mendebaldeko izkinan. Abuztuaren 4an 17:00etatik 02:00etara egongo da zabalik; hilaren 5etik 9ra, berriz, ordubete geroago irekiko da, eta 18:00etatik 02:00etara egongo da zabalik.
