Atzo goizaldean 27 urteko gazte iruindar bat hil zen Nafarroako hiriburuko Alde Zaharrean, eraikuntza aldamio batetik erorita. Polizia gertatutakoa ikertzen ari da. Indatxikia kalean hil zen gaztea, 03:40ak inguruan. Zenbait hedabidek jakinarazi dutenez, gaztea lagun batekin zegoen. Laguna etxera sartu zen, eta oraindik argitu ez diren arrazoirengatik gaztea aldamiora igo zen. Lagunak, berriro kalera atera zenean, lurrean aurkitu zuen.
Iruñeko udaltzaingoak gaztea hilik zegoela ziurtatu ondoren, haren gorpua Nafarroako Auzitegi Medikuntzako Institutura eraman zuten, autopsia egiteko. Espainiako Poliziak hartu du ikerketaren ardura, eta lehen zantzuen arabera, istripu bat izan zen. Gaztea Txantrea auzokoa zen, eta Gaztelu plazako taberna batean egiten zuen lan.
