Espainiako Auzitegi Nazionalak absoluzioa eman die 26/11 auzian epaitutako berrogei gazte independentistei. Urrian hasi zuten horien kontrako epaiketa, eta otsailean amaitu. Gaur eman du epaia auzitegiak. Eleak mugimenduak eman du ebazpenaren berri, Twitter bidez.
Azken ordua!!! 40ak libre!!!! Absolbituak izan dira. ZORIONAK!! EPAIKETAK ETEN!!
— Eleak Mugimendua (@EleakMugimendua) June 11, 2014Segi gazte antolakundeko kide izatea egotzita epaitu zituzten berrogei gazte, iazko urriaren 14tik aurrera. Seina urteko kartzela zigorra eskatu zuen fiskalak —denera, 240 urtekoa—, batik bat, inkomunikazio aldiko deklarazioetan oinarrituta. Goizane Pinedo, Unai Ruiz, Irati Mujika eta Idoia Iragorri ez ziren epaiketara aurkeztu, bideo batean adierazi zutenez, ez diotelako eurak epaitzeko zilegitasunik onartzen Auzitegi Nazionalari. Gerora, ordea, laurak atxilotu zituzten.
Manuela Fernandez Prado, Nicolas Poveda Peña eta Ramon Saez Valcarcel epaileek osatu dute epaimahaia. Povedak, ordea, boto partikularra eman du absoluzioaren kontra.
Hauek dira absoluzioa jaso duten berrogei gazteak: Irati Mujika, Ainara Bakedano, Jon Anda Velez de Mendizabal, Jon Ziriza, Gaizka Likona, Olatz Izagirre, Ion Telleria, Aitziber Arrieta, Garazi Rodriguez, Maialen Eldua, Eihar Egaña, Euken Villasante, Mikel Ezkiroz, Mikel Aiestaran, Xumai Matxain, Aritz Lopez Ugarte, Asier Coloma, Eñaut Aiartzaguena, Mikel Arkaitz Totorika, Nahia Elena Aguado, Idoia Iragorri, Xabier de la Maza Peña, Haritz Petralanda, Ibai Esteibarlanda, Carlos Renedo Zuriñe Gogenola, Jon Liguerzana, Nestor Silva, Unai Ruiz Pou, Goizane Pinedo, Jagoba Apaolaza, Zumai Olalde Saez de Uragain, Aitor Liguerzana, Bittor Gonzalez, Amaia Elkano, Garbiñe Urra, Itxaso Torregrosa, Oier Zuñiga Perez de Urabain eta Fermin Martinez.
Bost hilabeteko epaiketa
Fiskaltzak berak zalantzan jarri zuen, 26/11 sumarioko gazteen kasuan, tortura salaketak ikertzeko auzitegiek egindako lana. «Salaketa judiziala jarri den kasuetan, baieztatu egin beharko da ea ikerketa eraginkorrik egon den», esan zuen Luis Barroso fiskalak: «Gure ustez, ez da egon ikerketa judizial eraginkorrik».
Berrogei euskal herritar ezagunek sinatu zuten berrogei gazteak aske uzteko eskatzen zuen azken alegatua. Sinatzaileen artean zeuden, esate baterako, Jesus Egiguren PSE-EEko presidentea, Txema Montero abokatua, Amets Arzallus bertsolaria eta Irati Jimenez idazlea ere. "Harresiak zeuden lekuan" zubiak eraiki behar direla azaldu zuten, eta justiziaren arloan ere halaxe egin behar dela: "Bada arrazoibide eta tresna juridiko aski epaiketa honen emaitza bakearen aldeko urrats txiki bat izan dadin. Justizia garai berri baterako trantsizio ikuspegitik aplikatzen hasi behar da". Alegatu horren esku utzi zuten azken hitza gazteek epaiketaren amaieran.
[youtube]http://youtu.be/F2LZz0GF6B4[/youtube]
2009ko sarekada
Ia lau urte lehenagoko sarekadan du jatorria epaiketak. 2009ko azaroaren 24ko gauean izan zen. 34 gazte atxilotu zituzten Guardia Zibilak eta Espainiako Poliziak Araban, Bizkaian, Gipuzkoan eta Nafarroan, Fernando Grande Marlaska epaileak agindutako operazioan. Beste zazpi gaztek ihes egitea lortu zuten, eta Auzitegi Nazionalaren atarian —epaile aurrean aurkeztera joanda—, Lapurdin eta Erroman atzeman zituzten beranduago. 650 polizia eta guardia zibilek parte hartu zuten, eta Euskal Herrian izan zen Grande Marlaska bera ere. Ehun miaketa baino gehiago egin zituzten.
