Oreka Tolosa slackline taldeko kideek herritarrak harritzen jarraitzen dute. Martxoan, Tolosan egin zen MendiTour jaialdian, Nerbioiko ur jauziko highline jarduera kontatu zuten; ordura arte Euskal Herrian sekula egin zen luzeena zen. Ia kilometro bateko luzera zuen sokak, eta 200-300 metroko altueran kokatuta zegoen. Mario Hidalgo Oreka Tolosa taldeko kideak eman zituen ekintzaren xehetasunak. Bada, aste honetan, beste marka bat ezartzea lortu dute.
Joan den ostiralean, apirilaren 25ean, 1.050 metroko soka bat ezarri zuten Gazumeko tontorretik Hernioko kanalera —tontorreraino heldu gabe—; gehienezko altuera 100 metrokoa zen. Hernioko lepoa guztiz zeharkatzen zuen, Zelatungo borda gainetik igarota. «Kilometro pasatxokoa zen marka». Gainera, eskaladan egiten den bezala, sokari eta ibilbideari izena jarri diote: KM 0 —zero kilometro—; «bertakoa da eta», azaldu du tolosarrak.
(jarraitu irakurtzen Tolosaldeko Ataria-n)
