Atzo iragan zen auzia, eta berant iritsi zen fiskaltzaren galdea: urte bateko kartzela zigorra, gibelapenarekin. Miarritzeko errugbi klubeko kide ohi bati sexu erasoak leporatu dizkiote emazteen taldeko lau jokalarik, eta, epaia erabaki duenez, gizonak ezinen du gehiago bere lanbidea bete, hiru urtez. Hamar egun ditu orain deliberoaz dei egiteko.
22 eta 31 urte artean dituzte biktimek: lau emazte dira, lau errugbi jokalari, atzo Baionako auzitegian sexu ukipenak eta sexu jazarpena salatu zituztenak. Laurak ziren epaiketako parte zibilen artean, eta laurek eman zuten lekukotasuna. Gizonak 40 urte ditu, eta leporatzen dizkiotenak ukatu zituen hastetik buru.
Kontaketen artean, Ici Pays Basque irratiak jaso duenez, honako hauek azaldu dituzte biktimek: eskuak kirol bularretakoaren azpitik sartzen zizkiela bizkarreko mina artatzeko aitzakian, «sexuari fereka» egiten ziela eta ohar desegokiak egiten zizkiela: manipulazioetarako posizioak agintzeko momentuan sexu posizioei erreferentzia eginez, besteak beste.
Hala, urte bateko kartzela zigorra galdegin du fiskaltzak, gibelapenarekin.
