Mauleko Chaumes gasnategiko langile ohi bat epaitu zuten martxoaren 30ean, Paueko Auzitegian (Okzitania), sexu jazarpenagatik eta jazarpen moralagatik. Gaur heldu da epaileen erabakia: hamar hilabeteko kartzela zigorra, gibelapenarekin, eta sexu erasotzaileak biltzen dituen FIJAIS fitxategian agertzea haren izena. Akusatuak eskaera egin zuen auziaren erabakiak justiziako bilduman ez agertzeko, baina ukatu diote.
Orotara, sei emaztek salaketak jarriak zituzten haren kontra, sexu jazarpenagatik eta jazarpen moralagatik. Duela hilabete bateko auzitik landa, fiskaltzak gibelapenezko bi urteko kartzela zigorra galdegin zuen, baita biktimengandik urrun egoteko agindua ere.
Sei emazteetarik bost Mauleko Chaumes gasnategiko lankideak zituen erasotzaileak, eta seigarrena, berriz, Iratiko etxoletako lankidea. Hain zuzen ere, oraino Chaumes gasnategian lanean ari zela, barne mailako ikerketa egin, eta zuzendaritzak gizona kanporatu zuen; garai hartan, hango langilea izateaz gain, CGTko ordezkari sindikala ere bazen.
Iratiko etxoletan lan egin zuen gero: handik ere «joatea galdegin zitzaion», sostengu taldeko militanteek adierazi zutenez. Erraterako, Zuberoako Feministek bultzaturik, sostengu sare zabala osatua izan da sei biktimen inguruan.
Sei biktimen artean, lauk baizik ez dute lortu beren lekukotasun eta salaketekin akusatua kondenatzea. Erraterako, beste bi biktimen kasuan, preskripzioa aplikatua da batean, eta akusatua errugabetu dute bestean —Iratiko etxolen aferan—, «nahiko elementurik ez zelako».
Erabakiaz satisfos
Hala eta guztiz ere, sei biktimak nahiko «satisfos» atera dira Paueko auzitik, behin epaimahaiaren erabakia entzunik. Urteak dira aferak irauten duela eta haien hitza «etengabean zalantzan jarria» dela, gelatik ateratzean adierazi dutenez. Auzibidean, halere, «entzunak eta sinetsiak» izan dira.
Erabakia jakina da orain, eta akusatuak hamar egun ditu dei egiteko. Nolanahi ere, biktimek aitortu dute orain afera hori guztia gibelean utzi nahiko luketela, luze iraun baitu.
