Corellako (Nafarroa) 11 familiak Nafarroako Gobernuko Hezkuntza Departamentuari eskatu zioten D eredua ezartzeko herriko ikastetxean. Bada, eskaera ukatu zieten, eta aurten ere ez dute D eredua aukeran izanen. Erabaki horri buruz galdetu diote gaur Carlos Gimeno Hezkuntza kontseilariari, eta adierazi du gisako aldaketak egiteko protokolo bat dagoela indarrean, eta protokolo horretan, bertzeak bertze, gisako aldaketetarako epeak ageri direla. Gimenoren erranetan, ez dira data horiek errespetatu: aldaketak 2024ko irailean jakinarazi behar ziren beranduenez, eta familiek 2025eko urtarrilean egin zuten eskaera. «Garaiz eta modu egokian egin ez den eskaera bat ezin dugu onartu», adierazi du.
Gimenok erran du eskaera aztertzen hasiko direla orain, eta onartuko dela baldin eta «azpiegitura zerbitzuen, eskolaz kanpoko jardueren eta langileen txostenak positiboak» badira. «Ikastetxea handitu behar bada, horretarako dagoen diruaren arabera eginen da. Ez dugu ezer ukatu: aztertuko da, eta egoki aztertzen denean ikusiko da», gehitu du.
Halaber, erran du D ereduan ikasteko eskubidea «bermatuta» dagoela bai Corellako familiendako eta baita gainerako herrietakoendako ere: «Ezin bada herrian bertan bermatu, eskola mapan dagoen baliabide bat da, garraioa eta jangela zerbitzua bermatuak dituena».
