Gipuzkoako Plataforma Antitaurinoak Illunben (Donostia) zezenketak debekatzea nahi du. Gune hori berritzen ari dira, eta ez dute nahi aurrerantzean zezenen ikuskizunetarako lekua izan dadin. Hori defendatzeko, manifestazio bat antolatu dute datorren larunbatean, abuztuaren 9an. 18:00etan abiatuko dira Hernani kaletik, Bulebar ondotik, Aste Nagusiko txupinazoa baino ordubete lehenago.
Pilar Otegi elkarteko bozeramaileak adierazi du gune hori kirol eta kultur ekitaldietarako soilik erabiltzea nahi dutela. «Gizarteari entzuteko eta animalien sufrimenduari amaiera emateko garaia da», nabarmendu du. Azaldu du herritarren gehiengoak ez duela diru publikoa zezenen ikuskizunetan erabiltzea nahi. Zezenketak urtean hiru egunetan baino ez direla egiten gogorarazi du, eta gehienbat kanpoko jendea joaten dela horiek ikustera. Aste Nagusiko hiru zezenketez ari da, hain zuzen: aurten ere izango dira, abuztuaren 14an, 15ean eta 16an.
‼️‼️ cambio en la salida de la MANI, será desde la calle Hernani.
— Gipuzkoa Antitaurina (@GAntitaurina) August 4, 2025
MANItik irteeran aldaketa, Hernani kaletik izango da ‼️‼️ pic.twitter.com/UDMrDqiWqx
Zezenketak debekatzeaz gain, sokamuturraren eta entzierroen aurka ere egingo dute manifestazioan. Donostian ez ezik, Gipuzkoako beste zenbait herritan ekitaldi horiei ematen zaien babesa amaitzea nahi dute; esaterako Azpeitian, Deban eta Zestoan. Gainera, plataformak jakinarazi du lurraldeko udalen iritziak biltzeko prozesu bat abiatuko duela, jaietan animaliak erabiltzearen inguruan posiziona daitezen.
Eneko Goia Donostiako alkateak otsailean aurkeztu zuen Illunbe ingurua berritzeko proiektu berria. Kirola, kultura eta hainbat diziplinatako ekintzak egiteko leku bat sortuko zutela azaldu zuten, zezenketei aipamenik egin gabe zuzenean. Dena den, uztailean, Elkarrekin Donostiak zezenketak amaitzeko aurkeztutako proposamenari ezezkoa eman zioten EAJ, PSE-EE eta PP alderdiek.
