36 urteko gizonezko bat atxilotu zuen atzo Ertzaintzak Donostian, bikotekide ohiarengandik urruntzeko zuen agindua urratu eta hari etxean eraso egiteagatik. Ertzaintzak epailearen esku utzi zuen atxilotutako gizona, eta hark espetxeratzeko agindua eman zuen.
Atzo goizaldean abisua jaso zuen Ertzaintzak, Donostiako Amara auzoan ustez lapurreta bat egiten ari zirelako. Agenteak bertaratu zirenean, baina, ohartu ziren indarkeria matxistako kasu bat zela. Segurtasun Sailak jakinarazi duenez, ertzainek atea jo, eta emakume batek zabaldu zien. Hark esan zien bikotekide ohiaren eraso bat jasan berri zuela. Esan zienez, bera itotzen saiatu zen gizonezkoa, eta, horren ondorioz, erdi zorabiatuta geratu zen emakumea. Gainera, esplikatu zien indarrez atxiki zuela eta ezin izan zuela etxetik irten.
Poliziak ikerketa egin ostean, jakin zuen erasotzailea etxeko pertsiana batetik igo zela eta leiho txiki batetik sartu zela etxe barrura. Emakumea bikotekide ohia zuen, eta harengandik urruntzeko agindu judiziala zuen.
Ertzainek, etxean sartu zirenean, kutxa batean ezkutatuta aurkitu zuten gizona. Haien kontra oldartu zen, eta han bertan atxilotu zuten. Urruntzeko agindua urratzea, indarkeria matxista erabiltzea eta etxean indarrez sartzea egotzi diote. Epailearen esku utzi zuten atxilotua, eta hark espetxeratzeko agindu zuen.
