Gasteizko udaltzainek 47 urteko gizon bat atxilotu zuten atzo arratsaldean, Aldabe plazan, haur batzuen aurrean genitalak erakustea egotzita. Udaltzainei 21:00 aldera jakinarazi zieten gizon bat haurrei genitalak erakusten ari zitzaiela galtzak jaitsita. Udalak adierazi duenez, udaltzainak iritsi orduko gizonak galtzak igota zeuzkan, eta mozkorra zegoen. Lekukoak elkarrizketatu ondoren, udaltzainek gizona atxilotu zuten.
Gasteizko udaltzainek beste gizon bat ere atxilotu zuten atzo, 43 urtekoa. Neska adingabe bati jazarpen sexuala egitea egotzi diote, eta udaltzain bat jotzea. Herritar batek udaltzainei deitu zien 13:30ean, eta esan zien gizon bat neska adingabe bati jazartzen aritu zitzaiola, eta deitzaileari «mehatxu larriak» egin zizkiola kargu hartu zionean.
Udaltzainek inguruko kale batean aurkitu zuten gizona: genitalak ukitzen eta keinu lizunak egiten ari zen terraza batean eserita zegoen jendeari. Identifikatzeko eskatu zioten. Udaltzaingoaren arabera, gizonak uko egin zion udaltzainen aginduak betetzeari, eta menderatzen ari zirela, udaltzain bat jo zuen. Atxilotu egin zuten.
