Ertzaintzak 30 urteko gizon bat atxilotu zuen atzo Gasteizen, maiatzean sexu eraso bat egiten saiatzea egotzita. Eusko Jaurlaritzako Segurtasun Sailaren arabera, maiatzaren 31ko gauean, Gasteizen bertan, 19 urteko emakume bat jabetu zen gizon bat segika zuela. Emakumea dantzaleku batera sartu zen, eta, atera zenean, gizon horrekin topo egin zuen. Gizonak, emakumea bakarrik zegoela baliatuz, berarekin eraman zuen pilotaleku batera.
Pilotalekura bidean emakumea ihes egiten saiatu zen, baina erasotzaileak ez zion utzi. Hala ere, lortu zuen eskuko telefono bidez lagun bati mezu bat bidaltzea, laguntza eskatuz. Bere kokapena ere bidali zion. Pilotalekuan, gizona sexu erasoa egiten saiatu zen, Segurtasun Sailaren esanetan. Handik gutxira, ordea, emakumearen laguna iritsi zen, eta erasotzaileari aurre egin zion. Bultzaka eta kolpeka aritu ziren, eta erasotzaileak ihes egin zuen.
Ertzaintzak erasoaren ustezko egilea identifikatu eta atzo atxilotu zuen. Sexu eraso delitua egozten diote. Goizean eraman dute epailearen aurrera.
