Ertzaintzak gizon bat atxilotu du gaur goizean Trapagaranen (Bizkaia), Bilbon izandako auto istripu batekin lotuta: emakume gazte bat harrapatzea eta ezbeharraren tokitik ihes egitea leporatu diote. Biktima Gurutzetako erietxera (Barakaldo, Bizkaia) eraman behar izan dute, larri zaurituta.
Bilboko Udaltzaingoak berri agentziei jakinarazi dienez, 06:30ean gertatu da istripua, Sabino Arana etorbidean: emakumea errepidea korrika gurutzatzen ari zen, agian semaforoa gorrian zegoela; auto batek harrapatu du, eta gidariak alde egin du. Ordu erdi ingurura atzeman dute ibilgailua gidatzen ari zen gizonezkoa, Trapagaranen, eta Ertzaintzak atxilotu egin du.
