Gasteizko Udalak jakinarazi duenez, udaltzainek 50 urteko gizonezko bat atxilotu dute gaur goizaldean San Kristobal auzoan, indarkeria matxista leporatuta. Gertaerak 02:30ak aldera izan dira, Iruña-Veleia kalean. Udaltzainek abisu bat jaso dute esanez ibilgailu baten barruan emakume bat larrituta zegoela. Emakumea bakarrik aurkitu dute autoaren barruan, aurpegian odola zerion zauri bat zuela. Andrazkoak esan die bikotekideak eraso egin diola eta ihes egin duela gero.
Biktima artatu eta osasun zentro batera eraman dute. Bien bitartean, udaltzainek gizona aurkitu eta atxilotu egin dute, indarkeria matxistarekin lotutako lesio delitu bat egotzita.
