«Emantzipatzeko ezintasunaren aurka», manifestazio jendetsua egin zuen atzo GKS Gazte Koordinakunde Sozialistak Gasteizen. Amaitutakoan, zenbait gazte hiriko Alde Zaharreko etxebizitza huts batera sartu ziren.
Handik pare bat pankarta eskegi zituzten, «politikarien promes faltsuen aurrean, emantzipatzeko eskubidea borrokatu» ziotenak, eta adierazi zuten etxebizitza negozio iturri den bitartean hauteskunde kanpainan egiten diren «promes faltsuek» ez dutela balio.
Ertzaintzak gauean jo du etxebizitzaren kanpoaldean elkartutakoen aurka: borra kolpeka saiatu da atarian zeudenak sakabanatzen, eta haiei babesa ematera gerturatutakoen kontra ere oldartu da. Lagun bat atxilotu dute, zauritu ugari izan dira, baina gazteek etxebizitzaren barruan segitzen dute.
⚠️ Ertzaintza sekulako bortizkeriaz ari da Gasteizen: emantzipatzeko ezintasunaren kontra protesta egiteko, etxe batera sartu dira zenbait gazte iluntzean, eta kanpoaldean dauden pertsonen kontra kargatzen ari da Polizia. pic.twitter.com/BPrpSh4Efm
— Gedar.eus (@GedarLangileKZ) March 31, 2024
Manifestazioa
Arratsaldean, Emantzipazio ezintasunaren aurka borrokatu! Enpresariak eta politikariak errudun! lelopean mobilizatu ziren hiriko kaleetan. Amaieran, esan zuten «ahalik eta gazte gehienen kontzientzia politikoa piztu eta etxebizitza unibertsalaren aldeko indarrak batu» behar direla, eta egoera larria dela: «Baina larria langileriarentzat, ez etxebizitzaren auzitik negozioa egiten dutenentzat; horiek dira gazteon emantzipazio ezintasunaren errudun nagusiak».
