Iruñeko 51 urteko gizon bat hil zen atzo arratsaldean Nagoreko urtegian, Nafarroan. Bainua hartzen ari ziren herritar batzuek ikusi zuten gizona, ahoz behera, aisialdirako ontzi baten ondoan, eta haiek eman zuten abisua. SOS Nafarroak 16:17an jaso zuen deia, eta berehala jarri zuten martxan erreskate plana. Larrialdi zerbitzuak bertaratu ziren, anbulantzia eta helikopteroa tartean, baina ezin izan zioten bizia salbatu.
Hilotza Nafarroako Auzitegi Medikuntzako Institutura eraman dute, eta bertan egingo diote autopsia. Guardia Zibila ikertzen ari da zer gertatu den. Uda honetan lau pertsona hil dira itota Nafarroan.
