Gotzone Sagardui Eusko Jaurlaritzako Osasun sailburu ohia jada ez da Gasteizko Vithas ospitale pribatuko mediku zuzendaria, BERRIAk baieztatu duenez. Vithaseko zuzendaritzak, ordea, ez du albistea «baieztatu, ezta ezeztatu ere». Norte Expres hedabide digitalak aurreratu zuen albistea.
Iaz izendatu zuten Sagardui Vithas ospitaleko mediku zuzendari, Osasun sailburu izateari utzi eta hilabete gutxira. Izendapenak harrabotsa eragin zuen; legearen arabera, goi kargudunek bi urteko epea dute sektore pribatura itzultzeko harreman zuzena izan badute enpresa, sozietate edota erakunde pribatu horiekin. Eusko Jaurlaritzak, ordea, baimena eman zion Sagarduiri.
