"Berriz ere babesgabetasun izugarrian ikusten ditugu gure buruak mozal legeak okupazio indarrei ezarri dien eskumen bidegabeekin", adierazi du taldeak. Ohartarazi duenez, "arrazoi gabeko zigorrak" jaso dituzte lege hori oinarri hartuta, "gazte edota kontzientziadun pertsona aktiboa izateagatik".
Azken urtean, 4.600 euro ordaindu behar izan dituzte Altsasuko herritarrek "isun politikotan", eta azken zazpi urteetan kopurua 45.000 euro ingurukoa izan dela nabarmendu dute. "Haien hitza da gurearen aurka".
"Errepresio ekonomikoaren" helburua herri mugimenduaren aurka jotzea dela salatu du taldeak. Era horretan, azaldu dute, isunak ordaintzeko dirua biltzen ematen dute eragileek denbora, "bakoitzak bere lana egin beharrean".
Joan den otsailean, Guardia Zibilak Altsasuko kintoei mehatxu egin ziela salatu zuten.
Isunen taldetik jakinarazi dute isunak ordaintzeko diru bilketarekin lagundu nahi izanez gero, mezu bat bidali dezaketela interesatuek [email protected] helbidera.
