Hamahiru urteko kartzela zigorra ezarri diote Berlinen bilbotar bat sastakatu zuen gizonari. Iazko otsailaren 21ean gertatu zen erasoa, Alemaniako hiriburuaren erdigunean dagoen Holokaustoaren Oroimenezko Monumentuan. «Hilketa saiakera» eta «atzerriko erakunde terrorista baten parte izateko saiakera» delituak egotzi dizkio Berlingo Justizia Auzitegi Gorenak akusatuari.
Erasotzaileak lepoan zauritu zuen 30 urteko bilbotarra. Larrialdi zerbitzuak azkar iritsi ziren erasoaren lekura, eta laster eraman zuten ospitalera. Denbora tarte batean koman jarri zuten arren, egonkor zegoen, eta hiltzeko arriskutik kanpo, orduko hartan Alemaniako Fiskaltza Nagusiak eta Poliziak ohar baten bidez jakinarazi zutenez. Halere, auzitegi horretako presidente eta epaile Doris Huschek jakinarazi duenez, biktimak «kalte psikologiko larriak» pairatzen ditu oraindik; tratamentu psikologiko bat jasotzen ari da, eta ezin izan du, oraingoz, lanera itzuli.
Alemaniako Fiskaltzak bizi osorako kartzela zigorra eskatu zuen akusatuarentzat, eta biktimaren defentsak, berriz, hamabost urtekoa. Erasotzailearen defentsak, aldiz, zazpi urteko kartzela zigorra eskatu zuen, argudiatuta erasoa egin zuenean 19 urte zituela, eta zenbait kasutan posible dela 18 eta 20 urte artean dituzten gazteak adingabe gisa epaitzea.
«Presioa»
Akusatua Alemanian bizi zen errefuxiatu siriar bat da, 20 urtekoa, eta errefuxiatuentzako aterpe batean bizi zen, Leipzigen. Egindakoa aitortu zuen, eta azaldu EI Estatu Islamikoaren izenean «edonoren aurkako atentatu bat» egiteko asmoarekin bidaiatu zuela egun hartan Leipzigetik Berlinera. Sare sozialen bidez jarri zen harremanetan «talde terrorista» horrekin, eta auzi saioan esan zuenez, «presio handia» jaso zuen gisa horretako eraso bat egiteko. Erasoaz «damu» zela esan zuen gero, eta barkamena eskatu.
