Joan den urteko otsailean gertatu zen: Voxek etorkinen kontrako mezuak zabaltzeko karpak jarri zituen Berriozarren, Noainen (Nafarroa) eta Iruñeko Arrotxapea auzoan, eta Espainiako Poliziak bi lagun atxilotu zituen. Orduan, eskuin muturreko alderdiak epaitegian salatu zuen «biktima gisa» ez ziotela aukerarik eman auzian parte hartzeko, eta aste honetan jakinarazi dute dagokion epaileak arrazoia eman diola. Berriz hasi dute prozedura, Naiz-ek argitaratu duenez: hamasei pertsona deitu dituzte deklaratzera, eta bertze zazpi lagun identifikatzeko eskaera egin du epaileak.
Eskuin muturreko alderdiak jarritako karpen aurka protesta egin zuten hainbat herritarrek, eta istiluak zan ziren. Handienak Berriozarren gertatu ziren, eta foruzainek zenbait pertsona zauritu zituzten foam jaurtigaiekin. Anbulantzia bat bidali zuten zaurituak artatzera eta hala behar zutenak ospitaleratzera.
Prozedura judiziala, berriz, ustezko «gorroto delitu» batekin abiatu zuten, baina «desordena publikoa, atentatua, eta bi pertsonaren aurkako mehatxua» egitea egotzi zieten gero. Prozesua bi lagunen aurka hasi zuten, baina, Voxen helegitea tarteko, zabaldu egin dute. Oraingoz, identifikatu zituzten hamasei lagunek astelehenean joan beharko dute deklaratzera. Horrez gain, epaileak egun hartako bideoetan agertzen diren beste zazpi lagun identifikatzeko eskatu du. Hala, bitik 25era handitu da ikertu kopurua.
