Nafarroako Fitero eta Cintruenigo herrietako 66 etxebizitzatako maizterrak inbertsio funtsen aurka «borrokan» ari direla jakinarazi du Haritu etxebizitza sindikatuak. Sindikatuak ohar bidez azaldu duenez, etxebizitza horiek duela hogei urte eraiki ziren babes ofizialeko etxebizitza gisa, baina geroztik merkatu librera igaro dira, eta «orotariko funts eta kudeatzaileen esku» geratu dira. Egoera horrek etxebizitza horietako maizterrak «defendatu ezinik» utzi dituela deitoratu du sindikatuak, eta bilera informatiboa antolatu dute larunbaterako, arratsaldeko bostetan, Fiteroko Calatrava antzokian.
Etxebizitza horietako 47 Cintruenigon daude, eta beste hemeretzi, Fiteron. Harituren arabera, Cintruenigoko etxeetako maizterrak «defendatu ezinik geratu ziren etxejabeen segida amaigabearen ondorioz. Ez zekiten nor zen beren ugazaba, ezta beren kontratuekin zer gertatuko zen ere». Alokairua etengabe igo zietela ere salatu du sindikatuak. Joera horren amaiera «etxegabetze aginduak» izan ziren. Maizterrek, ordea, sindikatuaren laguntzaz antolaturik, etxegabetze horiek gelditzea lortu dute, eta «iraupen luzeko» kontratuak lortu dituzte, «prezio egokian».
Fiteron, berriz, egoera «kezkagarria» da oraindik, sindikatuaren hitzetan. «Jabeek ez dute kontratu berririk negoziatu nahi, eta hainbat etxegabetze prozedura abiatu dituzte», deitoratu du Harituk. Maizterrak, sindikatuaren laguntzaz, etxegabetze horien aurka antolatzen ari dira, eta erakundeei «berehalako konponbideak» eskatu dizkiete arazoari aurre egiteko. Sindikatuaren ustez, Fiteroko eta Cintruenigoko familien egoera ez da «arazo bakana», baizik «irabazi ekonomikoa etxebizitza bezalako oinarrizko eskubideen aurretik lehenesten duen eredu» baten egiturazko ondorioa.
