Haurrak etxean bakarrik uztea leporatuta, andre bat atxilotu dute Bilbon

Atzo goizean andre bat atxilotu zuten Bilbon ertzainek, seme-alabak —hiru ume, 2 eta 4 urtekoak eta zortzi hilabetekoa— etxean bakarrik uztea egotzita. Telefono dei baten bidez jakin zuten ertzainek bi ume txiki etxe bateko balkoian bakarrik zeudela. Atea apurtuta sartu ziren ertzainak etxean, eta balkoian zeuden umeak ez ezik, txikiena ere aurkitu zuten, lurrean. Etxera itzuli zenean atxilotu zuten emakumea. Umeen aita bertaratzeko ere agindu zuten ertzainek, eta handik gutxira atxilotu zuten; aurrez bete gabeko bi espetxeratze agindu zituela ikusi zuten. Badaezpada ere, ospitalera eraman zituzten hiru haurrak, eta ondoren gizarte zerbitzuek hartu zuten haien ardura. Laguntza zentro batera eraman zituzten.