Emakumezkoen greba hezkuntza arloan izaten ari den jarraipenari buruzko datuak eman ditu Jaurlaritzak. Ikastetxe publikoen %75etan izandako parte hartze datuak bildu ditu, eta, horien arabera, unibertsitatez besteko hezkuntzako profesionalen %21,92k egin dute bat grebarekin —irakasleak eta irakasle ez diren hezkuntzako langileak barne—.
Haurreskolak Partzuergoan, berriz, handiagoa izan da parte hartzea. Lanean ari diren 1.247 hezitzaileetatik, %43k parte hartu dute mugimendu feministak deitutako greban.
Eusko Jaurlaritzaren Osasun Sailak jakinarazi duenez, berriz, Osakidetzako langileen %11,8k egin dute bat grebarekin.
Bizkaian izan du eragin apalena mobilizaziorako deialdiak. Langileen %10,73k parte hartu dute mobilizazioan herrialde horretan, datu ofizialen arabera. Araban, %12,36koa izan da jarraipena, eta, Gipuzkoan, %13,30ekoa.
Administrazio orokorrean, grebaren jarraipena %21,29koa izan dela adierazi du Jaurlaritzak.
