Hendaiako atxikitze zentroan atxikiak direnak zaintzaileei oldartu zitzaizkien atzo. Batek jateari uko egin, eta orduan hasi ziren tirabirak: Ici Pays Basque irratiak jakinarazi duenaren arabera, janaria bota zuten, eta zenbait kamera andeatuak izan dira. Halere, zauriturik ez da izan. Zaintzaileek mugako Poliziari dei egin zioten laguntzera etor zitezen, giroa baretzera.
Hendaian dagoen atxikitze zentroan, nagusiki migratzaileak dituzte atxikitzen, administratiboki legez kanpo direlakoan mugan harrapatzen dituztenak. Peio Dufau eta Colette Capdevielle Ipar Euskal Herriko diputatuek ekainean bisitatu zuten zentroa, aitzinetik abisatu gabe: egoitzaren gabeziak azpimarratu zituzten, eta salatu han atxikiak direnei ez zaizkiela ematen zenbait zerbitzu; izan ere, ez dute ez Internet erabiltzeko, ez aktibitateak egiteko, ez liburuak eskuratzeko, ezta bisitak hartzeko eskubiderik ere. «Kartzelan baino okerragoa» da egoera, bi diputatuen ustez.
