Gasteizen, Portugaleten (Bizkaia), Eibarren (Gipuzkoa)... Zenbait herritan eskola publikoak batzeko asmoa du Eusko Jaurlaritzako Hezkuntza Sailak. Beste kasu bat gehitu da berriki zerrendan: Bilboko Deustuko Ikastola eta Deusto elkartu asmo dituzte, biak ala biak eskola publikoak. Elkarrengandik 350 metrora daude.
Horren harira, EH Bilduk galdera bat egin dio Eusko Jaurlaritzako Hezkuntza Sailari Eusko Legebiltzarrean. Saileko ordezkariek erantzun dute ikasturte honetan hasi direla prozesua lantzen, eta «integratzeko prozesu progresiboa» 2026-2027ko ikasturtean hasiko dela, HH Haur Hezkuntzako eta LH Lehen Hezkuntzako lehenengo mailetan. Gehitu dute gainerako mailak hurrengo ikasturtean edo bi urteren buruan integratu asmo dituztela.
Bat egitearen inguruko bestelako xehetasun batzuk ere eman dituzte. Esan dutenez, orain Deustuko Ikastolarena den eraikinean HHko eta DBH Derrigorrezko Bigarren Hezkuntzako ikasleak egongo dira, eta Deuston, LHkoak. «Gaur egun, behar horiei erantzuteko prestatuta daude leku horiek. Jantokiko eta jolas eremuetako baten estaldurako premia gehigarriak aztertzen ari dira», azaldu du Hezkuntza Sailak. Jangela Deustuko ikastolaren instalazioetan egongo da, eta asmoa dute han sukalde bat eraikitzeko ere.
Langileei dagokienez, Jaurlaritzak ziurtatu du bi ikastetxeetakoei eutsiko dietela. Are: «Aurreikusten da, behar izanez gero, langile horiek egokitzea eta gehitzea adin talde batzuentzat, sortzen diren premien arabera».
