Hiru gizon atxilotu dituzte Gasteizen eta bat Bilbon, indarkeria matxista egotzita. Eusko Jaurlaritzako Segurtasun Sailak adierazi duenez, irailaren 1eko gauean, 44 urteko emakume bat eta 31 urteko beste bat Gasteizko erdialdeko kale batean zeuden lo egiteko leku baten bila. Horretan ari zirela, bi gizon hurbildu zitzaizkien, eta beren etxera joatea eskaini zieten. Bi emakumeek gonbidapena onartu zuten, eta, etxebizitzan zeudela, gizonezkoek sexu erasoak egin zizkieten.
Ertzaintzak handik egun batzuetara izan zuen erasoaren berri, Gurutze Gorriko Biktimei Arreta Emateko Zerbitzutik abisua jasota. Ertzaintzak gertatutakoa ikertu zuen, eta emakumeen aurkako erasoak egin zituzten ustezko bi erasotzaileak identifikatu eta atzo atxilotu zituzten. 20 urte ditu batak, 21 besteak, eta aurrekariak dituzte zenbait deliturengatik.
Bi atxilotuak Gasteizko Guardiako Epaitegiaren aurretik igaro dira gaur.
Horrez gain, atzo iluntzean 36 urteko gizon bat atxilotu zuten udaltzainek, bikotekideari eraso egitea leporatuta. Poliziak dei bat jaso zuen esanez Zaramaga kalean gizon batek emakume bati eraso egin ziola; udaltzainak bertaratu zirenean, gizona identifikatu zuten, eta han bertan atxilotu.
Bilbon, berriz, 41 urteko gizon bat atxilotu zuen atzo Ertzaintzak, emakume bati sexu erasoa egitea egotzita. Segurtasun Sailak adierazi duenez, Miribillako parkean gertatu zen: gizonak emakumeari ukituak egin zizkion, baita zauriak ere; emakumeak ihes egitea lortu zuen. Ertzaintzak eta Bilboko Udaltzaingoak ikerketa abiatu zuten, gizona atxilotu, eta epailearen esku utzi.
