Bilboko metroko langileen hitzarmen kolektibo berria adostu dute enpresaren zuzendaritzak eta CCOO, Semaf, LAB, Egie eta ESK sindikatuek. 21 ordezkari sindikaletatik 11k bozkatu du alde, ELA, UGT eta CIM sindikatuek akordioaren aurka egin baitute. Semaf sindikatuak aldatu du iritzia, eta horrek ahalbidetu du akordioa sinatzea. Hori dela eta, aurrerantzean langileek ezingo dute greba eta lanuzteetara deitu.
ELAk gogor salatu du sindikatuek eta enpresaren zuzendaritzak sinatutako hitzarmena. Haien ustetan, hitzarmen berriak langileak «pobretzea» ekarriko du. Izan ere, 2025eko hasierara arte langileen soldata administrazio publikoak igotzen duen mailan igoko dute, eta ez KPIaren arabera; urte arteko KPIa %10,8an dago egun. Bestalde, enplegua «prekarizatu» egingo dela dio euskal sindikatuak, eta nabarmendu du behin-behineko langileetan «eskala bikoitzak» sortuko direla. Izan ere, haien esanetan, behin-behineko langileak etengabeko ebaluazioan egongo dira behin betiko izan arte, eta jardunaldi osoa «bermatua izan gabe» gainera.
Mantentze lanetako langileek aparteko orduak egiteko duten derrigortasuna handitu egingo dela ere ohartarazi du ELAk. Bestalde, diote ez dela bermatuko geltoki guztietan gutxienez langile bat egotea.
Laburbilduz, hitzarmen berriak langileen arteko zatiketa bultzatzen duela esan du ELAk, eta gehitu du baztertu egingo direla enpresako kolektibo batzuen baldintzak. Akordioaren helburua sinatzaileen interes partikularrak bultzatzea dela esanez amaitu dute oharra.
