37 urteko gizon bat atxilotu zuten atzo Usurbilen (Gipuzkoa), ibilgailu gidaridun batean 23 urteko emakume bati sexu erasoak egitea eta hura legez kanpo atxikitzea egotzita. Sexu erasoa asteazken gauean gertatu zen, eta ostiralean atxilotu zuten gizona. Larunbat iluntzean utzi dute epailearen esku.
Eusko Jaurlaritzako Segurtasun Sailaren arabera, emakumeak ibilgailu gidaridun bat eskatu zuen Usurbilera joateko, eta, herrira iristean, gidaria arraro portatzen hasi zen: autoan zentzurik gabeko itzuliak ematen hasi, biktimari galdera pertsonalak egin, eta autoko ateak blokeatu zituen. Emakumeak mezu bat bidali zion lagun bati, gidariaren jarrera azaltzeko.
Gero, gidariak autoa aparkatu, biktimari ukituak egin, eta musu eman zion aurpegian. Erasoa gertatzen ari zenean, mezua jaso zuen lagunak telefonoz deitu zion emakumeari; hortaz, gidaria autotik atera zen, eta autoko ateak ireki egin ziren. Emakumeak autotik ihes egitea lortu zuen orduan. Hala ere, gizonak biktimari jarraitu zion.
Senide batek biktima jaso zuen, eta salaketa jarri Hernaniko (Gipuzkoa) polizia etxean, eta hala atxilotu zuten gizona. 37 urte ditu, eta epailearen esku utziko dute orain.
Horretaz aparte, 59 urteko gizonezko bat atxilotu dute gaur goizaldean Astigarragan (Gipuzkoa). Ertzainei dei egin diete Donostia ospitaletik, eta jakinarazi erietxean artatzen ari ziren emakume bat esaten ari zela senarrak tratu txarrak ematen zizkiola; emakumearen arabera, azken egunetan bera itotzen saiatu da gizona bi aldiz, eta jo ere egin izan du. Mehatxu egin ere bai: gizonak esan izan dio bien alaba joko zuela.
Horiek horrela, emakumeak gaixo zegoen itxurak egin zituen atzo, eta anbulantzian ospitalera eraman zutenean kontatu zuen gizonak eraso egiten ziola. Gizonezkoa gidaria da, eta lanagatik zegoen bikotea Astigarraga inguruan.
Ertzainek gaur iluntzean utzi dute gizon hori ere epailearen esku.
Beste bi atxilotu Bilbon
Bilboko udaltzainek bi gizon atxilotu dituzte bart Aste Nagusiko jai eremuan indarkeria matxista egotzita. Guztira bederatzi pertsona atxilotu dituzte horregatik jaiak hasi zirenetik.
