Dozenaka ikasle eta eragile elkartu ditu gaur Bilboko Gas plazan Ikama ikasle antolakundeak, abenduaren 11n Hego Euskal Herriko hiriburuetan egingo dituen mobilizazioetarako deialdien berri emateko. Azaldu dutenez, euskara larrialdian dagoela eta, ikasleak deitu dituzte «euskararen aldeko borrokan lehen lerroa» hartzera. Hortaz, ikasleei dei egin diete Donostian, Bilbon, Gasteizen eta Iruñean egingo dituzten mobilizazioetan parte har dezaten. 12:00etan hasiko dira, Gure hezkuntza, euskalduna lelopean.
Ikamak kalera eramango dituen aldarriak honako hauek dira: «euskararen ofizialtasuna» eta «hezkuntza euskaldun propioa». Horrekin batera, mobilizazioetan salatuko dute azken boladan euskararen aurka justizian eta gizarteko beste eragileen artean hedatu den «oldarraldi politiko eta soziala».
