Iruñeko eskualdeko institutu bateko ikasle batzuk ikertzen ari da Foruzaingoa, ikaskide batzuen argazkiak adimen artifizialarekin moldatuta zabaldu zituztelakoan. Foruzaingoak adierazi du hainbat emakumezko ikasleren senideek jarritako salaketak jaso dituela. Adimen artifizialarekin moldatutako argazki horiek sortzeagatik, edukitzeagatik eta zabaltzeagatik ikertuko dituzte.
Ikastetxeak eman die familiei gertaeraren berri, eta ziurtatu die zer gertatu den argitzeko lanean ari dela eta biktimak babestuko dituela; zehaztu dute ikasle horiekin bildu direla, eta «entzuteko eta laguntzeko espazioak» eskaini dizkietela. Are, adierazi dute Nafarroako Gobernuko Hezkuntza Saileko Bizikidetza Aholkularitzarekin jarri direla harremanetan, kasua nola kudeatu jakiteko.
Bitartean, behin-behineko neurriak ezarri dituzte argazkiak manipulatu ahal izan dituzten ikasleen gainean —ez dute zehaztu zer neurri—. Dena dela, familiei jakinarazi diete arduraz jokatuko dutela, eta egiten ari diren lanean konfiantza izateko eskatu diete.
