Arabako, Bizkaiko eta Gipuzkoako ikastoletako langileek protesta eguna dute bihar. Hain zuzen, LAB sindikatuak deituta, giza katea egingo dute Bulebarreko kioskotik hasita Gipuzkoako hezkuntzako lurralde ordezkaritzara, 18:30ean.
Sindikatuaren esanetan hauxe da arrazoia: Eusko Jaurlaritzako Hezkuntza Saila ez dela betetzen ari sindikatuarekin 2023ko ekainaren 1ean adostutako lan akordioa.
Azaldu dutenez, itun horrek bi eremutan eragiten die ikastoletako langileei. Batetik, hitzartu zuten ikastoletako langile guztien soldatak sare publikoko langileen soldatekin parekatuko zituztela 2027rako. Bestetik, oro har lan baldintzei dagokienez, LABek dio adostu zutela azterketa bat abiatzea, sare publikoko langileen lan baldintzekin nola parekatu aztertzeko. Alta: «Gaur egun, Hezkuntza Saila izkin egiten ari zaio adostasunak betetzeko duen erantzukizunari».
ELA, beste hitzarmen baten alde
ELAk ohar bat atera du ikastolen inguruan. Haren irudiko, 2023ko akordioak «eduki eskasak eta bermerik gabeak» jasotzen ditu, eta, horrenbestez, beste hitzarmen bat egitea proposatu dio LABi. «LABek, gaur-gaurkoz, uko egin dio ELAren proposamenari».
Hori horrela, sindikatuak bide bat abiatzea erabaki du, beste lan hitzarmen bat lortze aldera, eta negoziaziorako mahai bat eratzea eskatuko du.
