Etxerat elkarteak jakinarazi duenez, baldintzapean aske geratu da Iker Olabarrieta Colorado euskal presoa. Auzitegi Nazionaleko Espetxe Zaintzako Epaitegi Zentralaren onespena jaso du erabakiak, eta espetxetik atera da preso bilbotarra. Hemeretzi urte egin ditu espetxean, eta hirugarren graduan zegoen iazko abendutik.
Olabarrieta 2005eko martxoan espetxeratu zuten, hogei urteko espetxe zigorra betetzeko, eta 2020ko martxoan bete zituen zigorraren hiru laurdenak. 2021eko maiatzean lekualdatu zuten Sevilla II espetxetik (Espainia, 990 kilometrora) Logroñora (Espainia, 170 kilometrora); orduan, bigarren gradura ere aldatu zuten. Euskal Herriratu, berriz, 2022ko urrian egin zuten, Basauriko espetxera ekarrita (Bizkaia).
