Ohi bezala, 23:00etan itxi zuten atzo Bilboko Indautxu auzoko Kirruli herriko taberna, baina goizaldean deus ez zegoen utzitako moduan: kristaletako bat hautsita zegoen, eta mezu faxistak zeuden horman idatzita. Iñigo Cabacas Herri Harmailak «eraso faxistak» salatu ditu; izan ere, tabernari eraso egiteaz gain, Iñigo Cabacasen omenez jarritako loreak lapurtu dituzte, loreontzia apurtu, eta taberna ondoko horman jarrita dagoen oroigarri bat margotu. Joseba Asensio Kirruli euskal preso ohiarena da plaka.
Naiz-ek jakinarazi duenez, mezu faxistak eta svastika naziak agertu dira tabernako horman, hala nola Cabacas jódete (Cabacas, izorra hadi) eta Viva Franco (Gora Franco). Nola Kirruli kultur elkarteak hala Iñigo Cabacas Herri Harmailak «irmoki» gaitzetsi dute erasoa, eta Bilbo «eraso faxistarik gabeko» hiria izatea aldarrikatu. «Aurrean izango gaituzue. Faxismoari sua!», erran dute Herri Harmailako kideek X sare sozialean. Berehala batu zaie Bilboko EH Bildu, eta, erasoa gaitzesteaz gain, «elkartasun osoa» adierazi die Iñigo Cabacasen senideei eta Kirruli kultur elkarteari.
Taberna kokatzen den plaza Iñigo Cabacas plaza deitzen da, hain justu, duela hamalau urte bertan hil zuelako Ertzaintzak Cabacas, Athleticen partida baten ondotik, gomazko pilota bat jaurtita. Joseba Asensio Kirruli hil zenetik, berriz, berrogei urte bete dira aurten. Auzokoa zen, ezker abertzaleko militantea eta euskara irakaslea, eta 27 urte zituela hil zen kartzelan, tuberkulosiak jota.
